Sa kushton një sistem POS për restorant në Shqipëri

Kjo është pyetja e parë e çdo pronari lokali dhe e vetmja që nuk ka një përgjigje të vetme. Dy restorante me të njëjtin numër tavolinash mund të kenë kosto dyfish të ndryshme, sepse njëri ka një pikë shitjeje dhe tjetri ka bar, kuzhinë, terracë dhe një kat të dytë.

Prandaj, në vend që t'ju japim një shifër që nuk do të vlente për ju, po ju tregojmë nga çfarë përbëhet kostoja. Kur i njihni zërat, e krahasoni vetë çdo ofertë që merrni — nga ne ose nga kushdo tjetër.

1. Modeli i pagesës: licencë apo abonim

Në treg qarkullojnë dy modele, dhe secili fsheh diçka.

• Licencë një herë. Paguani një shumë në fillim dhe programi është juaji. Pyetja që duhet bërë: çfarë përfshin mirëmbajtja pas vitit të parë, dhe sa kushton versioni i ardhshëm?
• Abonim mujor ose vjetor. Hyrja është e lirë, por kostoja vazhdon. Pyetja që duhet bërë: a rritet abonimi sipas numrit të pajisjeve, përdoruesve ose pikave të shitjes?

Një abonim që duket i volitshëm për një tablet bëhet tjetër gjë kur lokali ka katër kamarierë me nga një pajisje, një ekran kuzhine dhe një arkë. Llogarisni gjithmonë koston për konfigurimin që do të keni në gusht, jo për atë që keni në shkurt.

2. Pajisjet

Software-i është vetëm gjysma. Pajisjet janë shpesh zëri më i madh i vitit të parë:

• Pajisjet e kamarierëve — telefona ose tabletë. Nëse sistemi punon në shfletues, mund të përdorni pajisje që i keni tashmë.
• Printerët termikë — një për arkën, shpesh nga një për bar dhe për kuzhinë. Printeri me rrjet kushton më shumë se ai me USB, por kursen kabllo dhe telashe.
• Ekrani i kuzhinës — nuk është i detyrueshëm; shumë kuzhina punojnë me printer. Por ekrani heq letrën dhe mban radhën sipas kohës.
• Rrjeti — ruter i mirë dhe, në lokalet me kate ose oborr, një pikë e dytë WiFi. Ky është zëri që anashkalohet më shpesh dhe shkakton më shumë probleme.
• Sirtari i arkës dhe UPS-i — i vogël si shumë, i madh si siklet kur mungon.

3. Instalimi dhe të dhënat fillestare

Një sistem nuk fillon punë bosh. Dikush duhet të fusë menynë me çmime dhe kategori, të lidhë produktet me barin ose kuzhinën, të krijojë përdoruesit dhe të drejtat e tyre, të konfigurojë printerët dhe — nëse mbani inventar — të regjistrojë recetat dhe përbërësit.

Pyesni kush e bën këtë punë. Nëse përgjigja është "e bëni ju", kjo është një javë e stafit tuaj dhe duhet llogaritur si kosto.

4. Trajnimi

Një sistem që stafi nuk e përdor dot është shpenzim i dyfishtë: paguani programin dhe vazhdoni me bllokun e shënimeve. Trajnimi i mirë matet me kohë, jo me broshura: një kamarier duhet të marrë porosinë e parë brenda 15 minutash nga hera e parë që prek pajisjen.

Pyesni gjithashtu çfarë ndodh në qershor, kur merrni staf sezonal. Trajnimi i parë është i lehtë për t'u premtuar; i katërti brenda vitit është ai që tregon si punon vërtet shitësi.

5. Zërat që dalin pas nënshkrimit

Këta janë zërat që rrallë shkruhen në faqen e parë të ofertës:

• Tarifë për çdo pajisje ose përdorues shtesë. Sezoni ju sjell dy kamarierë të tjerë; a rritet fatura?
• Module që shiten veçmas. Inventari, rezervimet, raportet e avancuara ose porosia me QR ndonjëherë janë zëra më vete.
• Mbështetja jashtë orarit. Lokali punon të shtunën në 23:00. A punon mbështetja atëherë, dhe me çfarë çmimi?
• Migrimi i të dhënave. Nëse kaloni nga një sistem tjetër, kush i transferon menynë, klientët dhe historikun?
• Fiskalizimi. Programi i fiskalizimit, certifikata elektronike vjetore dhe POS-i janë gjëra të ndryshme. Shihni çfarë bën secili para se t'i përzieni në të njëjtën llogari.

6. Kostoja që nuk shkruhet askund

Zëri më i shtrenjtë i një sistemi POS nuk është në asnjë ofertë: koha kur sistemi nuk punon.

Një mbrëmje e shtunë e kaluar me letër do të thotë porosi të humbura, gabime në faturim dhe dy orë punë të nesërmen për të rindërtuar xhiron. Nëse ndodh tri herë në sezon, ka kushtuar më shumë se diferenca mes dy ofertave që po krahasoni.

Prandaj pyetja "a punon pa internet?" nuk është teknike, është financiare. E kemi shtjelluar veçmas te POS që punon pa internet.

Si ta krahasoni një ofertë me një tjetër

Para se të vendosni, kërkoni që çdo ofertë t'i përgjigjet të njëjtave gjashtë pyetje me shkrim:

1. Sa është kostoja totale e vitit të parë, me pajisjet dhe instalimin brenda?
2. Sa është kostoja e vitit të dytë, pa pajisje?
3. Çfarë ndodh me faturën nëse shtoj dy pajisje dhe një pikë shitjeje në sezon?
4. Cilat module janë brenda çmimit dhe cilat shiten veçmas?
5. Çfarë mbulon mbështetja, në cilat orare dhe brenda sa kohe përgjigjet?
6. Çfarë ndodh me të dhënat e mia nëse një ditë largohem?

Oferta më e lirë në zërin e parë shpesh nuk është më e lira në zërin e dytë. Krahasoni të dyja bashkë.

Si e trajtojmë ne këtë pyetje

Ne nuk publikojmë një çmim të vetëm, sepse do të ishte i pasaktë për shumicën e lokaleve. Shohim si punon lokali juaj — sa pika shitjeje, sa staf, çfarë pajisjesh keni tashmë — dhe japim një ofertë me zërat të ndarë, që ta krahasoni me cilëndo tjetër. Nëse doni të filloni, na shkruani ose lexoni më parë se si funksionon sistemi POS për restorante dhe bare.